АналитикаСаясат
Маанилүү

Садыр Жапаровдун штабындагы тыңшоочу жабдыктар коомчулукка кагылган коңгурообу?

17-февраль күнү кечинде абактагы cаясатчы Садыр Жапаровду колдоо штабынан тыңшоочу аппарат табылган. Бул тууралуу саясатчынын жакындары бир катар жалпыга маалымдоо каражаттарына билдиришкен.

Алардын айткандарына караганда, тыңшоочу аппаратка окшош түзүлүштү таап алышып, милицияга кабарлашкан. Бул боюнча Бишкектин Биринчи Май РИИБинин кызматкерлери иш алып барышууда.

Бул окуяга байланыштуу Садыр Жапаровдун Жапаровдун жактоочусу Шарабидин Токтосунов соттун чечими жок кимдир бирөөнүн сүйлөшкөн сөздөрүн жаздырып алуу мыйзамсыз экенин айтып, жабдууну орноткон адамды кылмыш жообуна тартууну талап кылды:

“Бирөөнүн сүйлөшкөн сөздөрүн мыйзамсыз түрдө жаздырып алууга эч кимдин укугу жок. Керек болсо УКМКга да андай укук берилген эмес. Эгер мыйзамсыз жаздырып алган болсо дагы ал далил болуп эсептелинбейт”, – деди жактоочу.

Окуя болгон жерге Бишкектин Биринчи Май РИИБинин кызматкерлери келип, тыңшоочу аппарат экенин ырасташкан. Ал эми штаб мүчөлөрү тыңшоочу жабдыктарды Улуттук коопсуздук боюнча мамлекеттик комитет орноткон болушу мүмкүн деп шек санашууда. Азырынча бул боюнча УКМК комментарий бере элек. Болуп жаткан акыркы кырдаалды эске алуу менен бирге биз да бул суроого жооп издеп көрдүк.

Тыңшоочу жабдыктарды ким койгон?

Мурдагы депутат Садыр Жапаровдун штабында тыңшоочу аппараттын табылганына боюнча штаб мүчөлөрү  тыңшоочу жабдыктарды Улуттук коопсуздук боюнча мамлекеттик комитет орноткон болушу мүмкүн деп шек санашууда. Бирок бул боюнча УКМК комментарий бербей жаткандыгы да көп суроолорду пайда кылууда.

Тыңшочу аппараттарды ким койгон болушу мүмкүн деген суроого 2 түрдүү жооп:

1. Садыр Жапаровдун тарапташтары

Бул тыңшоочу аппараттарды Садыр Жапаровдун тарапташтары койгон болушу мүмкүн. Аны коюу менен коомчулуктун көңүлүн өзүнө буруу же аларга жана алар колдоп жаткан саясатчыга кысым болуп жатканын, катуу көзөмөлгө алынып, коопсуздук органдары тарабынан аңдылып жатканын элге жеткирүүнү максат кылган болушу мүмкүн. Анткени алар 2-март күнү митинг өткөрүүнү пландап жатышат. Бул окуялар митингдин алдында болуп жаткандыгы  жана да алардын бул аппараттарды Улуттук коопсуздук боюнча мамлекеттик комитети орноткон болушу мүмкүн деп жар салганы ушул ойго түртөт. Эгер коомчулуктун көңүлүн буруу үчүн болсо, анда абакта жаткан саясатчылардан бир эле Садыр Жапаров актуалдуу болуп турат. Бул дегени анын коомчулуктун көңүлүн бурудурууга муктаждыгы жок. Тарапташтары да мындай ишке бармак эмес. Демек, бул вариант туура болушу күмөн.

2. Улуттук коопсуздук боюнча мамлекеттик комитети

Улуттук коопсуздук боюнча мамлекеттик комитети орноткон болушу мүмкүн. Бирок Жапаровдун тарапташтарын тыңшоо үчүн эмес. Анткени улуттун коопсуздугуна коркунуч келтире турган кадамдардын алдын алуу үчүн мындай эскиче ыкмаларды колдонуп, мындай олуттуу каталарды кетирмек эмес. Эгер чын эле УКМК орноткон болсо, демек, булар муну койгонунун себеби башкада. Алар Садыр Жапаровдун тарапташтарына силер биздин көзөмөлүбүздө турасыңар деген эскертүүнү бергиси келгендей. Ошол эле учурда башка саясатчыларга Садыр Жапаровго жакындашпагыла деген кооптуу коңгуроону кагып жаткан болушу мүмкүн. Муну менен алар, бул саясатчы биздин көзөмөлүбүздө жана силер да биздин көзөмөлгө түшүп калбагыла деген белги. Муну саясатта жүргөн, тажрыйбасы бар адамдар жакшы түшүнсө керек.

Эске салсак, Садыр Жапаров “Бийлик өкүлүн барымтага алуу” беренеси боюнча айыпталып, Биринчи Май райондук соту он бир жыл алты айга күчөтүлгөн тартиптеги абакка калтыруу чечимин чыгарган. Жаза аткаруу мамлекеттик кызматы Садыр Жапаровдун жаза өтөө мөөнөтүн мунапыска байланыштуу кыскартуу боюнча өтүнүчүн Аламүдүн райондук сотуна жөнөткөн. Бирок соттук коллегия өтүнүчтү канаатандырган эмес.

 

Толугу менен

Тектеш темалар

Back to top button