Аналитика
Маанилүү

Блоггерлерге иштеген мыйзам депутатка иштебейби?

17-февралда 22 жаштагы блогер Элмирбек Сыдыманов Жазык кодексинин «Улуттук, расалык, диний же аймак аралык кастыкты козутуу» беренеси боюнча шектүү катары кармалып, 48 саатка убактылуу кармоочу жайга киргизилди. Бул факт боюнча Бишкек шаарынын Октябрь райондук милициясы сотко чейинки териштирүү иштерин жүргүзүп жатат.

Ал эми Жогорку Кеңештин депутаты Камчыбек Жолдошбаев 5-февралда парламентте Премьер-министр Мухаммедкалый Абылгазиевге Ат-Башыда логистикалык борбор тууралуу суроо берип жатып, Улуттук, расалык же диний кастыкты козутканбы деген суроонун тегерегинде жазып чыккан элек. Анда Жолдошбаев:

“Бизде Ат-башыда ласткалык центр (логистикалык борбор – ред.) курабыз деп, куралбай элдер каршы болуп жатышат. 0,1%ды түзгөн уйгурлар бар. Ошолор элди акча берип бузуп жатат. Ушуну Мухаммедкалый Дүйшекеевич өзүңөр барып түздөп койсоңор болбойбу” – деп айткан.

Улуттук коопсуздук мамлекеттик комитети депутат Жолдошбаевдин сөздөрүн талдоого алып, саясий-филологиялык  экспертиза жүргүзүп, эгер бул айткандарын далилдей албаса, “Кылмыш жаза” кодексинин 299-беренеси (Улуттук, расалык же диний кастыкты козутуу) менен кылмыш иш козгошу керек. Анткени депутаттын айткандарында улуттар аралык жаңжалга чакырыктар бар экени даана көрүнүп турбайбы? Же блоггерлерге иштеген мыйзам депутатка иштебейби?

Буга чейин «Фейсбуктагы» «БеспределKG» баракчасынын модератору Афтандил Жоробеков кармалганда да укук коргоочулар муну сөз эркиндигине жасалган кысым катары баалашкан. Андан мурдараак, Улуттук коопсуздук боюнча мамлекеттик комитет (УКМК) Кыргыз мамлекеттик курулуш, транспорт жана архитектура университетинин окутуучусу Темир Болотбекке карата 2018-жылы 1-мартта «улут аралык кастыкты козуткан» деген айып менен кылмыш ишин козгогон. Буга ал «Фейсбукта» Кыргызстан эгемендик алганга чейин Бишкекте салынган имараттарды сындаганы, аларга суктангандарды «совок» деп атап, «Рашага көчүп кеткиле» деген маанидеги сөздү жазганы негиз болгону кабарланган.

 

Толугу менен

Тектеш темалар

Back to top button