Дүйнө

Өзбекстанда кагылыштан эки милиция кызматкерлери жабыркады

Сурхандарыя облусунун Алтынсай районунда үйлөрү сүрдүрүлөрү тууралуу эскертип келген милиция кызматкерлерине каршы жергиликтүү эл күрөк, кетмен менен чыгышты. Кагылышууда эки милиционер жана жергиликтүү бир тургун жаракат алган.

Күбөлөрдүн айтымында 14-февраль күнү Халкабад маалээсине райондук акимчиликтин, прокуратуранын жана милициянын өкүлдөрүнөн турган топ келип, алардын үйлөрү сүрдүрүлө турганын маалымдашкан. Бул жаңылык элди дүрбөлөңгө салып, тараптар ортосунда чатак чыккан. Соцтармактарга тараган видео тасмаларда адамдар милиция тарабынан күч колдонуу болгонун айткан жерлери бар:

“Алар адамдарды иттей уруп, сүйрөп жатышат. Мына караңыз, булар күнөөсүз карыяны сабап жатышат” деген адамдын үнүн кадр сыртынан угууга болот.

Сурхандарыя облустук ички иштер башкармалыгы тескерисинче Халкабад маалээсинин тургундары милиция аларды тынчтандырууга аракет кылган учурда каршылык көрсөткөнүн маалымдады. “Кээ бир адамдар милиционерлерге таяк, балта жана күрөк менен кол салышты” деп айтылат маалыматта. Анда ошондой эле чатак түштөн кийин саат 16:00 чамасында, милициянын атайын отряды келгенден кийин гана басылган.

Кагылыштан кийин кеминде алты жергиликтүү тургун камакка алынганы кабарланды.

16-февралда Өзбекстандын Башкы прокуратурасы бул окуя тууралуу маалымат таратып, ага “мыйзамсыз курулган үй ээлерин” айыптады. “Халкабад маалээсинин алты тургуну 39 сотых айдоо жерин өз билемдик менен басып алып, ал жерге үй курушкан” деп жазылган билдирүүдө мыйзамсыз курулуштарды бузуу үчүн ээлерине эки күн уруксат берилгени айтылган.

Башкы көзөмөл органынын маалымдашынча, Алтынсай районундагы чатактан улам райондук милиция бөлүмүнүн кызматкерлери Шерзод Мустофокулов менен Абдимумин Жабборов жаракат алган. Ал эми жаракат алган тургун жана камалган алты киши тууралуу сөз жок.

Толугу менен

Тектеш темалар

Back to top button