Экономика

Жээнбеков өлкөнүн жолдорун оңдоого канча каражат керектигин айтты

Мамлекет башчысы өлкөнүн өнүгүшү үчүн транзиттик потенциал керек экенин билдирип, аны арттыруу үчүн жаңы жолдорду куруп, эскилерин талапка ылайык келтирүү керектигин кошумчалады.

Президент Сооронбай Жээнбеков эл аралык маанидеги жолдорду калыбына келтирүүгѳ жалпысынан 500 миллион доллардын тегерегинде инвестиция талап кылынарын айтты. Бул тууралуу ал «Туруктуу өнүгүү үчүн реформаларды тездетүү» аттуу форумда билдирди.

Жээнбеков өлкөнүн транзиттик потенциалын жогорулатуу, ал үчүн жолдордун сапатын жакшыртуу жана жаңы жолдорду салуу абдан актуалдуу экенин белгиледи.

«Азыркы учурда 13 магистралдык жолдо курулуш иштери жүрүп жатат. Жол куруу долбоорлоруна республикалык бюджеттен каражат бөлүнүүдө. Ошону менен бирге донорлор тарабынан колдоого муктажбыз. Түндүк — Түштүк автожолундагы коопсуздукту камсыздоо иштерине кошумча 56,5 миллион доллар талап кылынат. Тараз — Талас — Суусамыр автожолунун 4-фазасын курууну каржылоо боюнча сүйлөшүүлөр жүрүп жатат. Туризмди өнүктүрүү үчүн стратегиялык мааниге ээ болгон Ысык-Көл «шакекче жолун» долбоорлоо боюнча иштер жүргүзүлүүдө. Түп — Кеген унаа жолун 2024-жылы аяктоо пландаштырылууда», — деди Жээнбеков.

Президент өз сөзүндө бул жолдун аякташы менен туристтерге бир кыйла ыңгайлуу шарттар жараларын кошумчалап, соода-экономикалык карым-катнаш жакшырып, туризмдин өнүгүүсүнө түрткү болорун билдирди.Ал, андан сырткары, жол тармагында Кытай — Кыргызстан — Өзбекстан темир жолунун курулушу эң ири долбоор экенин айтып, эл аралык мааниси чоң долбоорду өнөктөштөрдүн колдоого алышы абдан актуалдуу экенин белгиледи. Аны менен катар «Манас» аэропортунун жана анын тутумуна кирген аймактардагы аэропорттордун инфраструктурасын модернизациялоого инвестиция талап кылынарын билдирди.

 

Ачкыч сөздөр
Толугу менен

Тектеш темалар

Back to top button
Close
Close